მოსვლას აპირებს წვიმა

მოსვლას აპირებს წვიმა ავტორი: გალაკტიონ ტაბიძე

მოსვლას აპირებს წვიმა,
იგრძნო ღრუბლების გემმა,
გააწკრიალა სიმმა
შენი სახელი - ემა.
გადატეხილი მეხით
ლამის დაღამდეს ბარემ,
დიდებისაკენ ფეხით
კიდეც გასწია მთვარემ.
ყალბი ბოჰემა, აგერ,
სივრცეს უცქერის უვრცესს,
ჰგავს ის ძაფებით ნაკერ
ძველი გაზეთის ფურცელს.
დაე, მფრინავი ლანდი
მიაქანებდეს ფოთლებს,
იყოს საღამო ზანტი,
მე კი გადავშლი ბოდლერს.